Cliquen Struktur Geschichte Partner-Clique Gönner Antrag Stammkalender Aktuell / Infos Member
Sürkrütt Waggis Basel History Anno 1950 hän sich e baar Aagschtellti us de BVB-Wärggschtett zämme do, und e Waage- Clique grindet. Doozmool no mit Ross und Waage. Im Grindigsjoor het sich die Clique „Colis Suisse Clique“ ghaisse. S’Fasnacht mache het dääne zwelf esoo gfalle, dass si beschlosse hän, die Clique wyter z’fiere. In däm Zämmehang hän si au dr Namme gänderet. D’Sürkrütt Waggis sin us dr Dauffi ghoobe worde. Im BVB-Personal het das esoo gfalle, ass alli Passivmitgliider worde sin. Sälli Zyt het me no fir Dreifranggefuffzig kenne passiv wärde. D’Sürkrütt Waggis hän kenne en alte Mylidääraahänger ginschtig bsoorge. Bim Umbaue het me aber glyy gmerggt, dass das Gschtell z’kurz isch. Die ganze Umbauarbete hän so vyyl Zyt in Aaschpruch gnoo, ass es nimme glänggt het, an dr Fasnacht vom Joor 1951 mitzmache. Anno 1952 isch me s’erscht Mool under em Namme Sürkrütt Waggis an d’Fasnacht. Laider isch dääwääg im Comité syne Biecher e Missverschtändnis basiert, dert isch nämlig als Grindigsjoor „1953“ uffgfiert. Fir uns isch aber 1950 s’Grindigsjoor, somit fyyre mir im Joor 2000 s’fuffzigjeerige Jubiläum. In de letztschte fuffzig Joor hets bi de Sürkrütt Waggis e mängge Aktive gha, es sin „Hochs“ aber laider au „Dieffs“ z’verzaichne gsi. Doch es isch de Aktive, bsunders em harte Kärn, immer wider glunge, dä gueti Namme vo dääre Clique am Lääbe z’bhalte. In de erschte baar Joor het me zwoor e Sujet usgschpiilt, isch aber amme mit eme Stroowaage ummegfaare. Aber mit dr Zyt het me au bim Waagebau mee Fantasyy walte losse und je lenger je mee uff e Schtroowaage verzichtet und e zem Sujet bassende Waage baut, was nit soll haisse, dass me nit wider emool e Schtroowaage baut (adje Subvention). Im Lauf vo dr Zyt het sich die Clique au personell veränderet. Hitte isch es kai Clique mee vo de BVBler, aber e Verain us verschiidene Schichte und Brieff. Unser Zyyl isch es, kimftig e suuberi Fasnacht z’mache und allewyyl Fantasyy und e Farbdupfer in Cortège z’bringe.